遺忘

話都冇咁快，2015又到左尾聲
呢一年直接d講，根本係鳩fing左一年，愈來愈自閉，我唔記得呢一年有乜野係令我刻骨銘心，有時同d fd傾開計，發覺自己好似遺忘左好多野，可能每一日我都過得麻麻地，根本冇心機去記，所有野都拋諸腦後
糜爛既生活，不需去記吧?

自閉

成日都聽人講，一個愈寂寞，就愈容易養寵物，貪寵物可愛，可以有個伴，但係我就覺得有一種人，反而係經常糾纏係唔同既人際關係，佢地都會養寵物

我覺得自己愈來愈似呢種人，愈來愈抗拒陌生人，愈來愈唔想花時間去經營人際關係，愈來愈唔關心自己仲有冇朋友，自我中心到一個點

當有朋友同我講佢覺得開心既事，有一句說話經常第一時間浮現係我腦海裏…關我咩事?我諗我真係自私，我連想去笑想去回應想去分享呢種喜悅都做唔到，我連去聽去理解都覺得費神覺得無聊覺得眼訓

有時收左工，我淨係想食支煙摸下貓攤係梳化浪費時間，我淨係想咩都唔諗，腦海一片空白，任由時間流逝，唔想講野，唔想聽人講野，咩都唔想理

摸下貓貓望下貓貓玩下貓貓，自言自語講下廢話，吞雲吐霧望下個天，簡簡單單的虛渡一間晚上

我唔理解自己而家究竟係咩狀態，無牽無掛，無慾無求，唔係開心又唔係唔開心，我唔理解，亦都冇人理解，人前人後，我開始有兩個樣

我其實都好撚犯賤，冇人陪會想有人陪，有人陪又會嫌人煩，自己搞到咁人唔似人，鬼唔似鬼都係自己攞黎

麻木?

我記得我鐘意一個女仔，舊年佢搵到一份新工要去澳門做野，去之前佢請左我食一餐飯，我依然都係咁沒精打采，佢顯然對在澳門的日子充滿期待

前日同返佢仲有兩個朋友約返出黎食飯，佢都冇乜點變過，都係痴痴地線，食野好慢，成個麻甩佬咁，成晚都有講有笑，但無意間佢爆左自己比條仔激親

喔，比條仔激親，我試過on99問佢佢冇答我

當時我內心竟然出奇地平靜，竟然冇果種晴天霹靂既感覺，亦都冇果種妒火中燒既感覺，如果有人問我係咪仲鐘意佢，我會答係，但竟然會咁平靜我自己都覺得出奇

或者，我唔刻意去追，保持返做朋友既距離，繼續尻嗡，串串柒柒，做返自己，我會仲開心，其實果晚之後我算係放下心頭大石

每個人都有唔同一面，佢係我面前都總係表現得好麻甩好硬淨好直接，但係我覺得，係佢條仔面前，佢會表現得好lady，麻甩女唔一定會揀番麻甩仔，正如十個麻甩仔有九個都係鐘意小鳥依人既學生妹

最後，感情既野，隨緣啦
會遇上的總會遇上的
念念不忘，必有回響
應該會吧?

第一次一個人旅行

其實決定單拖去西藏都只四天前的事，我冇諗過我會咁毫不猶豫就去

可能因為生活太頹廢，好想任性一下，好想去闖蕩一下，好想好想好想有返衝勁

好想自己可以為左想做既野不顧一切！

點解會係決定西藏其實根本唔重要，我只係想一個人去一個少人去既地方探險

呢個地方可以係蒙古，可以係俄羅斯，可以係肯雅，可以係乜都得

只要唔係平時成日聽既旅遊國，例如台灣，日本，韓國，泰國等

我想係我仲後生，仲有氣有力既時侯去一些我老了根本不可能去的地方

去感受一下那些冷門旅遊點的文化，氣息，生活方式

或者每個人去旅行都需要一個目的，但我係為去而去

點解要去？我答你唔到，我只係想去，我只係想趁後生去，我只係唔想留係香港營營役役咁過日子，算唔算係目的？

我要去西藏！！！

Fuck my life

今日我悶到飛起，完全唔做乜好
結果係上黎打日記

九點幾醒左，再訓過，十點幾始終避無可避咁醒左
Whatsapp咁岩有水吹，很好，吹左幾句，然後打機
打到無無聊聊，打Ｊ，都係打到無無聊聊，上高登
上左陣肚餓，落街食飯，食完飯上返黎再係打機上高登
一直on99咁唔知做咩，終於悶得濟搵fd一齊operation
然後條友話:今日父親節呀,op咩peration呀?

聽到真係得啖笑，我完全忘記左今日係父親節
嗯，我果種一到節日就會好重既負能量又出黎
又開始諗做人為左咩，親情係咩黎
諗極都唔通，好迷惘
我好似已經放棄左去追尋自己鐘意既野，放棄左屋企
我唔想理阿婆，老豆，老俊，肥盈既野
好煩

今日我覺得好悶好無聊好煩燥
拎起枝結他，彈兩野就擺番低；拎起本書，睇幾頁又擺番低
我唔知電腦電話對我有咩吸引力，但係我全日都冇放低過
我好憎自己變到冇哂熱情，好憎自己變到咁廢

噩夢

今晚發左個好奇怪既噩夢,半夜醒左

我夢見自己同朋友去新加坡旅行，夢既開頭有個叫何家勁既人扮Eason好叻，趺左落海失蹤左

然後場境一轉，我係酒店出面，有個南亞藉人士請我食野，類似肉卷咁既物體，咁我又真係食左，食左少少之後，佢想搶我電話，咁我緊係唔肯啦，我一直走，講英文同佢講我部電話好平，你去買啦咁上下既野，但係佢一直都唔肯走，一直死纏爛打咁跟著我

之後我同一個朋友入左lift，佢都跟埋入黎，我扮野禁左六樓，一到六樓，個南亞佬就行左出去，咁我地緊係狂禁關門制啦，點知佢返轉頭，想入返黎，好憤怒咁拍對列門

嘭！嘭！嘭！
其實果陣我真係幾驚，一部電話駛唔駛咁兇狠呀.....
我狂禁關門制同警鐘，朋友就出盡全力拍埋對列門，搞左陣，部列終於關到門，我同朋友即時鬆一口氣，返去五樓自己房

返到去房抖左陣，突然聽到d鋸木聲，望一望大門，條友拎著把電鋸，鋸緊對門入黎.........
然後我就醒左喇

唔知點解，我好似成日發夢都係夢見自己比人追殺，發親呢d夢，好多細節我都會記得幾清楚
可能生活太枯燥太壓抑，所以先會發噩夢

Empty

愈來愈少寫日記，其實不是愈來愈忙
而是生活愈來愈無聊，愈來愈公式化
每天返工放工，放工回家上網睇電視
有時去做下健身彈下結他

好無聊
一個人的時間愈長，感到的不是自由自在，反而是空虛寂寞
成日都會諗起以前讀書既生活，果陣就真係自由自在多姿多彩
好想約返以前既朋友食飯吹水聚一聚，我亦都有做到
我好享受聚埋一齊既時間，其實做乜都冇所謂，只要係聚埋一齊就可以
但係每次熱鬧完，返到屋企，有時真係更加空虛

呢種感受唔係第一次發生，發生無數咁多次
但始終都係揮之不去

好想返去以前
好想有人可以走入我既世界

2015(續)

拖下拖下,原來2015年已經踏入二月,終於覺得自己要寫點東西

呢年
CCNP
健身減肥,呢個真係好難
可以既,我想學番車

我既毅力同集中力好似愈來愈低
好多野都好易放棄

下次健身,試下諗下某個人
希望會有效果,但係我唔會再搵佢
掛著佢好似變左一個習慣

2014(續)2015(始)

要諗返2014年有咩開心事發生,好似有點難道

三月執左大命返黎,果三日都冇覺好訓,隔幾個鐘餵一次奶,初初以為佢過唔到第一晚,但係又比佢捱到,第二晚返黎我真係好開心,我決定養佢,就算同阿婆開火我都冇所謂,果下我真係有火,真係當佢係我個女咁,好鐘意望著佢,好期待佢會開眼望返我,但係結果都係事與願違
有刻我係到諗,係咪我害死佢,其實貓媽媽唔係唔要佢,係咁岩執緊其他仔比我見到,我又好心做壞事執左大命返去.....又有時會諗,係咪我粗心大意,餵奶餵到入佢個肺,搞到佢濁親....
我都唔知......但係果種感覺仲係好強烈,果種你終於搵到你一定要奮不顧身去守護既野,誓死捍衛....大命,希望你係彩虹橋過得開開心心,唔會感到寂寞冰凍,冇人蝦你,希望你未見過我都會記得我.........痴鬼線,明明話寫開心事,寫寫下喊左出黎

六月同班莊員去左墾丁,係開心既,但講真,同真正既開心好似有點距離
夏天的墾丁很美,陽光與海灘,美女與比堅尼,我很喜歡這個地方,很喜歡這個地方的風土人情
其實班莊員都好好,基本上訂機票酒店玩d咩去邊到都唔駛我去操心,所有都plan好哂
我諗係我既性格問題,總係有點貌合神離的感覺
可能大家對旅行既定義都好唔同,我好鐘意玩即興,我期待既旅行係去到先再諗去邊睇咩玩咩食咩,我諗係其他人眼中,我好hea,鐘意9 fing.......咁其實我又唔否認既,我仲會認我幾stubborn
另外一樣野,如果一班人去旅行,我會好期待夜晚一班人攬著個枕頭傾計.....其實都唔知點解,但係我覺得咁樣大家好似一家人,好溫馨
有時我都好奇點解我而家咁麻甩,但係有時心態會咁似女仔

我未寫完,會再寫

2014

2014年，過得好唔愉快既一年

年頭同阿婆就嘈左獲甘，我都唔記得為左咩而嘈，但係當同舅父講電話果陣，忍唔著喊左一次

三月尾係屋企樓下見到隻岩岩出世既貓仔訓左係路邊，果陣落緊大雨，佢就攤左係到比雨淋，果陣諗左一陣，決定執佢返屋企，我叫佢做大命，但係養左三日佢就去左，又喊左一次，呢次真係喊到仆街，好似個親生女死左

年中同阿婆嘈左一次，又喊左一次，仲要搬埋出黎

成年同shalott愈行愈遠，相對無言，我知佢應該唔會再搵返我，就算佢再搵返我，佢都唔會再好似以前咁對我咁好，有時諗起佢，攤起張床上面都會眼濕濕

928雨傘革命，好熱血咁去參與，曾經我以為香港離真普選好近，689，共產黨會讓步，中間試過做一d驚險既事，訓過好多晚街，最後75日佔領過去，大家咩都得唔到

十二月，生日冬至聖誕一齊黎，預左自己會孤伶伶一個人，成個月都好頹廢，暴飲暴食，肥左十幾磅，鐘意就返工，唔鐘意就唔返，最後寂寞難耐，上左人生第一次青樓

回顧返成年，可能係我近幾年喊得最多既一年，成個人都冇成長過，冇目標冇熱情冇火，除左唔開心既事，就係得返工放工，結他…接近冇練過，運動…有成半年冇做過，煙…戒唔成仲愈食愈多，日子過得一日得一日，錢亂洗，冇乜積蓄

唔想再抑鬱落去，我會檢討2015年應該點做
我唔想再冇目標冇寄託咁做人，失去左既野要拎返返黎，我會寫篇2015年展望同埋2014年發生過既好事，希望我仲記得