二零一二年大事回顧

二零一二年的最後一天，寫點東西為自己留下紀念吧！

不過這一年過得很快，快到我不太記得這一年發生過什麼事，真的好像一剎那間，時光就由二零一二年一月一日走到二零一二年十二月三十一日

其實二零一二年冇咩大事回顧，都係補習賺錢，煲煙吹水，返學訓覺，吃喝玩樂，嘻嘻哈哈，識左好多新朋友，但係冇幾多個可以保持聯絡

前年玩自己人生第一個Ocamp，舊年搞自己人生唯一一個Ocamp，亦都做左自己人生第一次組爸

熱血過，開心過，辛苦過，但係.....真係冇感動過，一滴眼淚都流唔出，對唔著好多人
特別係東陽，Christy，Mandy，Cow，我自己都覺得自己好冷血

今年去玩大O，好想再一次熱血過，開心過，辛苦過
今次其實同舊年差唔多，仲要冇熟人，中間比人攻擊過，亦都攻擊過人
今年仲要多左幾分黑暗，我呢次大O經驗真係幾失敗

但係，人生最特別就是這個＂但係＂，將負面變正面，正面變負面
而呢個＂但係＂出現得好合時侯

我好鐘意呢組巴比倫既爸媽仔女，我唯一一次係大學時間流左少少眼淚就係因為你地
唯一一次，多謝你地比我既回憶，你地係sit game喊，叫我地唔好走，同營長理論......
所有野就好似尋日發生咁，特別係Vivi，Felix，Tom，AT
我真係好鐘意你地

唔記得左幾時，同Jovan吹水，吹吹下我覺得自己成個大學生活除左Ocamp就咩都冇
冇錯，真係咩都冇
其實係我諗得灰定係事實真係咁？

算啦，唔重要，只可以講Ocamp係我既大學生活入面比到我既真係好多好多好多

屋企，突然想講屋企
呢個屋企唔知幾時開始好似有少少變化，大家關係都和諧左
多左野講，但係.......我都係唔太想返去
點解呢？我自己都唔係太清楚，或者係因為我怕當我係到長住既時侯，呢個屋企又會因為我嘈起上黎

感情方面呢，依然都係一潭死水，呢一年我鐘意過兩個女仔，但係都係好冇吉士冇出過手
係邊個就唔講啦，我自己知就得.......媽呀，好毒呀

我覺得係時候要改變下我既人生態度
曾經有一段時間，我覺得思考係負累，愈想愈無謂
呢句格言令我少左鑽牛角尖，少左好多唔開心既野，但係都令我錯過左好多機會，好多應該感動流淚的時刻

走馬看花，應該珍惜的，我都錯過了

其實讀大學為左咩？當初入黎係為開心
入左黎呢？其實呢兩年都過得好開心
但係除左開心呢？曾嘉偉你仲有咩得著？書本既知識你得到既幾多？真心朋友你係大學又識到幾多個？你為你既未來付出過幾多？你比未入大學之前既自己變得更冇方向感，你入大學之前雖然係好廢，但係仲敢去追你鐘意既女仔，入到黎反而咩都唔敢追？

總結黎講，二零一二年我過得好糊里糊塗，唔知做過咩就完左既一年
我冇好認真看待每一日，我冇好好報答對我好既人，我冇好好咁追尋自己想要既野

如果二零一一年係一個苦樂參半既年份，咁二零一二年係一個好迷惘既年份
二零一三年又會係一個點樣既年份呢？

趁自己仲有些少火，訂個小小既一年計劃
認認真真咁過每一日
好好珍惜而家擁有既朋友
減少廢氣排放
考五級樂理
搵個女朋友
決定自己既志向

講得出就要做得到！