一個人既時侯特別會胡思亂想
唔想寫既一件事，但係事隔半個月我又想寫返
話說半個月前，有一晚同屋企吵大獲，令到我決定唔返屋企
其實係我錯先，我鬧左你一句垃圾
但而家事實係，你連垃圾都不如
真係好失望，我真係覺得呢個親生細佬冇得救，係你眼中我只係一個自私自利既人，我既存在基本上只係阻著你訓覺，阻著你溫書，搞到你冇得用電腦，哈，我欠左你架？
對老豆媽咪都好失望，我呢兩個老豆老母都係傻架，做左咁多年人都係冇腦
係，我係一個不孝子，亦都係一個懦夫，我唔夠僵當面講
所以我要係呢個冇人見到既地方鬧自己既屋企人
但真係不吐不快，屈著屈著我好辛苦
咁多年黎都將教仔既責任推比人做，自己永遠唔會教
有錯你去縱佢，縱到兩個細佬妹都極度自我中心，或者其實我都係，我都唔知點講
其身不正，佢地學哂你地貪錢，物質化既價值觀
做野辛苦，點解唔叫仔女體諒下？好冇面咩？
我講過N咁多次，可唔可以唔好淨係講錢.......
可唔可以講下價值觀，講下理想，講下目標，或者你地根本冇諗過呢D野，或者你地覺得搵錢養我地好緊要，但你地有冇諗過教育都好緊要，呢樣野比三餐溫飽更重要.....關乎我地五個人既未來.......可唔可以大家坐埋傾下計似返一家人......
我真心覺得就算我地係窮，只要大家亙相扶持，我地都可以扭轉未來
就算你地兩個唔可以坐埋一齊都唔好係我地面前鬧交啦..........
其實你地兩個識唔識聽人話架.......
點解同一個屋企既人，去到今時今日，大家都唔可以對大家有包容同體諒？
我勸你早點返屋企，你覺得我想困著你
我勸你早點溫書，唔明問我，你覺得我擺款，大學生巧威威牙？
你唔想讀書，我勸你諗一諗有咩目標，你覺得我自己都做唔到，但又學人講大道理
我問你如果你考唔到大學，讀著HD/ASSO先好唔好，你永遠都係話唔好，但係永遠都唔努力
其實你係一個咩人，大家都心中有數，但係今年我對你係特別有期望
你講過你覺得自己哂左好多時間
我問你記唔記阿爺係我地好細個既時侯講過做人最緊要係自力更生，你話記得
姨媽話你同條女散左，喊到痴左線，叫我返黎睇下你
有一排我覺得你係積極左，同之前幾年有點唔同，大家都傾多左計，我地既關係都改善左好多
但到最後，你都係冇改變過，你都係咩都唔想做，只係想打機養蝦煲煙
你冇諗過咩叫做自力更生，老豆比三千你，媽咪比三千你，你覺得係應份，完全冇任何感激
考DSE都係考之前一個月開始溫哂咁多科做下樣比人睇
屋企交租水電煤，永遠唔關你事，你廿二歲人咩都唔駛做就個個月有人養有錢洗，我遲左冇扲錢，媽咪諗著CUT埋我果份，哈......真係好諷刺，究竟呢個係咩屋企？
一年又係咁，兩年又係咁，今年係第幾年呀？
你真係垃圾都不如，但偏偏你係我細佬
我既眼淚偏偏為一件垃圾都不如既廢物而流
當我決定行出呢個門口既時候，老豆喊著同我講........
你走左咁我點算.....
我都想知你仲可以點算，係呢個屋企最需要有人主持大局既時侯，你去左坐監，我地果陣又點算？你只係識講佢地唔聽你講，從來都唔做D野令人聽你講，我其實都唔想聽你講，我好憎你
我唔想有一個咁灰暗既人生，我先至努讀書比自己一個保障，我係好多年前同自己講過，我既性格絕對唔要似老豆媽咪，但當我要面對畢業既時侯，如果我唔係一個大學生，我好似咩都唔係，咩都唔係.........
我而家好憎呢個屋企，好憎呢到既所有人包括埋我自己
我覺得自己其實都已經唔係人，呢個日記愈寫愈黑暗
已經違背左我好多年前寫日記既初衷
我內心有一部份已經變得枯萎
沒有留言:
張貼留言