唔開心

我已經好長時間都好情緒低落，成日夜晚都唔知點解係咁諗野，成日都訓唔著覺，然後到天光先訓得著，返工冇精神，完全唔想返，有時訓醒已經係下晝，索性就唔返工。

我覺得我既精神狀態其實好差好差，但係應該冇人睇得到，就算我肯去講，好似又冇咩人認真會聽同埋理解我發生緊咩事，試過略略提下，得返黎既反應通常都係＂係咁架喇＂，＂個個都係咁啦＂，＂香港打工仔係咁＂，聽完之後真係好失望，唯有笑一笑然後大大聲講＂，又係喎，你岩喎！！！＂。

我有試過搵朋友一齊食飯聚下，係開心既，但熱鬧過後，個感覺好空虛，我好似仲多野諗，仲難訓得著。返工其實冇特別野發生，雖然有時有d tasks我覺得麻煩，好唔想做之外，都冇咩大問題，同事之間既相處我覺得係幾好同埋愉快既。人工都仲夠過活。

其實整體黎講，所有都不過不失，但係我又唔知點解唔開心。

我真係唔知點解唔開心，而家既狀態係意志消沉，情緒低落，所有野都冇目的，每一日都毫無意義咁過，我真係唔想咁樣落去。

我覺得自己而家根本係一個死廢青。