時過境遷

時過境遷，半年有多，但係我仲放唔低一個人
試過識其他人，試其他事，報潛水報學車，為左識多點，有多點興趣
試過溝第二個，去旅行，約食飯睇戲行山，送花
試過去嫖去滾，食唔同既女
但係我都係分心唔到，會諗返佢
唱ｋ自己係到喊，揼骨自己係到喊，食煙自己係到喊，去旅行睇佢有冇上線

所有野都好似為做而做咁，唔係發自內心去做，只係為左分心，放低佢
做完好冇滿足感，好冇意義，好似仲空虛左，愈會諗起佢

諗起佢約我去旅行，但係最後冇去到
諗起我想送花比佢，但係最後冇送到
諗起好多野，有愛，又有恨

當然，所有野都係我一廂情願，對佢黎講，應該好快就放低左我
或者唔應該講放低，因為根本就冇拎起過

呢個係我可憐但係又抵死既地方
我真心左，但係佢根本冇所謂
我真心左，但係我咩都冇做到

我仲係好掛著佢，我想同佢講，不如我地從頭黎過
我好想知到佢既近況

算啦，我都係發洩
夠鐘死心架喇，放低啦，放過人都放過自己啦

應該好好愛惜自己，照顧好自己
我覺得我好厭惡自己，覺得自己做咩都係錯，唔配幸福呢兩個字

路

終於遞信走人，太過心軟，對人仁慈，對自己殘忍，唔應該投放太多感情，諗太多無謂野

路，只有一條，向前行
其實冇野好擔心冇野好驚，就一直向前行

下沉

遇過一個女仔,有段時間日日一齊傾計睇電視跑步見面,但我毒撚到驚表白之後會冇左個好朋友,所以我一直都冇行動

有段時間佢返工日日都唔開心,我幫佢諗搵咩工好,自己google搵下有咩工岩佢做,問朋友點樣入行,最後佢去左澳門做佢想做既野,臨去前請左我食餐飯,但係我成晚都心不在焉,其實我好想喊

之後有段時間冇同佢聯絡,我以為我抽左身

之後唔知點解又聯絡返,但係佢拍左拖,雖然話我地係好朋友,但係佢從來都冇同我講過佢拍拖既事

之後佢散左,我地又開始日日傾計whatsapp,好似無所不談,但係我知佢唔會同我講佢既感情事,最深處既心事佢一直都唔會講,其實我知佢都只係當我係朋友,但係我又抽唔到身

之後我好想改變,好想同佢係埋一齊,游水健身,好想擺脫而家咁毒既形象,但我都仲係一條柒頭

柒頭就柒頭啦,又會諗約佢多點見面,希望可以製造多點機會,有時又會傻下傻下咁諗我地有幾年感情,傾過咁多野,做過咁多野,點都會有點機會

毒撚就係毒撚,諗咁多無謂野
你以為緣份好深好深,其實好淺好淺
你約人,人地schedule未full就會攝你落去,只係咁,唔係因為你係邊個,有更好既活動,就會放你飛機

第一次去澳門,佢寧願隊草都唔理你
第二次去澳門,佢寧願返香港都唔理你
約過無數次,每次都係因為唔同籍口而不了了之

你想要的，你永遠都得不到

我得到了答案，一早知的結果 

解脫了，不用再猜來猜去，我知我會傷心，我知我會心痛，我知我會很不習慣，我知我之後做人會更漫無目的

算了吧，至少．我解脫了

減肥健身

身高/cm	體重/lb	BMI
173	160	24.2

Schedule

星期一	星期二	星期三	星期四	星期五	星期六	星期日
游水	休息	健身	游水/cm	休息	健身	游水

星期一至五收工做
星期六日希望可以朝早做
游水游蛙式30個塘,大概一個鐘左右
健身初期主要做背同腳,幫手減肥同改寒背

背
滑輪下拉
1. 拉到頸前
2. 正手拉
3. 1.5倍寬
暫時都未係好有感覺,二頭肌三頭肌會累得快過背肌

坐姿划船
未開始

引體上升
未做到...

腳
Leg press
呢個比較有感覺

食
1500-2000kcal
2000mg Na
50-60g fat

食物	熱量/kcal	蛋白質/g	脂肪/g	鈉/mg
麥香雞	380	0	15	707
魚柳包	362	0	17.7	965
瘦叉	575	0	0	0
野菜煎雞扒飯	550	0	0	0
茄牛飯	665	0	0	0

Life cannot just be about solving one sad problem after another

呢個日記最後都只係淪為一個樹洞,唉

最近呢排都好煩躁,好易嬲,成日都唔知點解覺得自己人生好似已經唔會再變得美好
日日自己一個既時侯好容易就諗自殺,死左會唔會好過點

我知道咁樣唔係咁好,可能真係會做錯事,但係控制唔到自己唔去諗
我應該搵多點事去做,搵多點人去傾,將自己投入返呢個世界,但係我就提唔起勁
出到黎嬉嬉哈哈癲完,我只係更加空虛

我唔知搵邊個傾,我唔想搵人傾
我講唔出我有幾慘,但係灰曚曚的想法一直纏擾著我
更何況我講完,應該冇咩人識比反應我,可能最後都係我自己笑笑口講點無謂野打完場
更加大既可能係我會因為其他人既冷淡或者偽善而變得憤怒,對人窮追猛打,傷到人又傷到自己

我開始明自己係呢個世界,係大部份人既心目中,都係冇乜priority
會跟我聯繫的,只是因為我有時講野幾好笑,幾一針見血
唔係因為當我係朋友兄弟情人,唔係因為我係佢心目中有幾重要
純粹係因為我既某種功能,同我聯繫,會onon99嬉嬉哈哈,好放鬆,唔駛用腦,舉棋不定又想有人肯定自己,我可以講好多野去支持返人,我既定位就係由唔知幾時開始,變左做一個工具人
而當我冇呢d功能,有時我根本就唔想講野,只係想放空發呆,我知係會有人覺得我好奇怪同埋會疏遠我,當我講我自己真正既諗法,講一個因為長期孤獨而變得愈來愈厭世既自己,我明會點,我估到會有咩反應,所以我唔想講,就算已知自己係其他人心目中冇乜priority,當面對呢d反應,我只會對身邊既人,對呢個世界愈來愈失望

每一日都週而復始
訓醒勁唔願意起身返工,但係返工就嬉嬉哈哈,收工一個人行返屋企成日都諗死左會唔會更好
返到屋企同雪雪傾兩句,睇下股票,又係諗死唔死好,訓覺係床上面係咁碌電話,眼訓擺底部電話,又係諗死唔死好,聽日又係咁樣過一日,全日最安慰,可能就係見到雪雪每一日都咁無憂無慮

成日都會覺得我想得到既,我呢世都唔會得到
唯有靠搵錢同女人去麻醉自己

所有野都冇所謂啦,我鐘意既人唔會鐘意自己
我討厭而家既屋企人但又渴望自己會有一個家庭
我想有一個自己既容身之所,唔想每隔一兩年就要搵人同搬屋
當面對所有生活上既野都好無力

其實好大機會,有問題既係自己
最根本既解決辨法就係解決自己而唔係將自己既問題推去呢個世界,埋怨身邊既人唔當自己係一回事,最根本係令自己變得更有內涵更加重要,我唔想搵籍口推個波去呢個世界,推個波比人,我只係想投降,變同唔變我都覺得好厭倦,點解做人會咁煩,點解每一排我就會唔開心,每一次唔開心我都係要解決問題,每一日都係解決問題,解決感情既問題,解決人際關係既問題,解決錢既問題,解決工作既問題,解決自己既問題,解決人地既問題,一個問題又一個問題,解決完一個又一個,有開心過咩?

早排睇過一段說話,睇完講真都幾感觸
Life cannot just be about solving one sad problem after another. There need to be things that inspire you, that make you glad to wake up in the morning and be part of humanity. That is why we did it. We did for you.

睇完真係好羨慕可以有咁既人生,有咁既成就,又好感慨自己真係成世人淨係不斷解決問題,搵唔到自己鐘意做既野,又搵唔到鐘意自己既人,一事無成

頂到幾耐得幾耐啦,可能一年半載之後自己睇返,只係一件小事

聽日去游下水,做下運動,分散下注意力
用我自己既講法,每隔一排,我既情緒就會比狗追,側埋一邊,我唔係第一次諗死唔死好,唔係近排先諗死唔死好,只係每一次,呢隻狗都好似愈來愈惡,當然每一次,我都好似愈來愈強,但其實咁樣隔一排打狗我好厭倦,現實係我每大一歲,我都好似離我想得到既野愈來愈遠,問題解決唔到始終仲會比狗追,我唔想比狗咬死,但係我又好厭倦

loop

小記

今日星期日都要返工，心情真係認真麻麻

今日聽到某人好似開心咁講尋晚有個男仔fd過黎澳門，係澳門行街行一晚然後今日兩個人繼續hea

我唔知呀，我聽完之後只係笑笑一下，好妒忌同好嬲，諗起之前自己去澳門得到d咩待遇
我個心有d那著那著咁

呢個就係priority，永遠都係最後
就算我唔滿意，唔鍾意，直接去表達，呢樣野都改變唔到

收唔收到postcard，食唔食飯，睇唔睇戲，睇唔睇棟篤笑，我都冇所謂
我好厭要咁樣篤一下郁一下咁既模式，純粹係因為有時間冇人約，所以攝你入黎
唔係因為係你，所以抽時間黎見你

我頂唔順，我好厭倦，我想抽身